Кандидатот за градоначалник на Скопје, Орце Ѓорѓиевски, денес го претстави својот нов проект за младите – „SKOPJE CITY GO“. Во присуство на голем број млади, Ѓорѓиевски објасни дека оваа иновативна картичка има за цел да ги обедини сите услуги што ги нуди Градот на едно место, со што се олеснува секојдневното користење на јавниот простор и јавните сервиси.
Со „SKOPJE CITY GO“, граѓаните ќе можат да го користат јавниот превоз без редици и готовина, да плаќаат паркинг, како и да пристапуваат до културни и забавни содржини како музеи, театри, кино, жичара и зоолошка градина – сето тоа преку една унифицирана дигитална или физичка картичка.
Проектот е насочен и кон социјална еднаквост. Средношколците, пензионерите, семејствата со ниски примања, невработените и лицата со попреченост ќе имаат бесплатно или значително намалено користење на услугите. Покрај тоа, општествено одговорни компании ќе нудат дополнителни поволности за корисниците на картичката.
„Со ‘SKOPJE CITY GO’ сакаме да го направиме Скопје поефикасен, помодерен и поддржувачки град за сите жители. Технологијата треба да служи за олеснување на животот на луѓето, особено на младите и ранливите категории“, истакна Ѓорѓиевски.
Проектот ќе биде достапен како мобилна апликација, но и во класична физичка форма, за да биде лесно употреблив за сите граѓани, без разлика на возраст или технолошки навики.
