Фото: Hristijan Mickoski
На денешната 68. седница на Собранието, пратеникот Скендер Реџепи му постави прашање на премиерот Христијан Мицкоски.
Реџепи побара одговор дали државен интерес претставува почитувањето на Уставот и, доколку тоа е така, како е можно премиерот, министрите, пратениците и претседателот на Собранието да дозволуваат постојано прекршување на истиот со употреба на име кое не е уставно дефинирано. Премиерот Мицкоски во своето обраќање возврати на прашањето на Реџепи.
„Околу името сега треба да се договорите со вашите коалициони партнери, овие викаат не сме го вратиле името, вие викате сме го вратиле името. Дај договорете се кај сме. И со овие новите позади таму. До каде сме? Дај договорете се! Мене стварно не ми е јасно ова однесување. И навистина јас очекував од вас господине пратеник да бидете поголем демократ. Моето уставно загарантирано право на слобода на говор и така натаму кое е заштитено да го почитувате. Не можете вие мене да ми кажете како да ја нарекувам мојата земја. Мојата земја сум кажал е Македонија и ќе биде Македонија. Во интерес, токму на оној државен интерес и слично кога давав заклетва ја спомнав придавката да не дојде до некои други компликации. Инаку нема да слушнете поинаку“, кажа Мицкоски.
