ЕЕС системот се имплементира од 12 октомври, ќе важи и за македонските државјани

Европската Унија од 12 октомври ќе започне со постепено воведување на новиот систем за влез/излез (ЕЕС), информираше евроамбасадорот Михалис Рокас. Целта на оваа мерка е зајакнување на безбедноста на надворешните граници на ЕУ, но и олеснување на процедурите за патниците.

Со новиот систем, сите граѓани од земји што не се членки на Унијата ќе мора еднократно да се регистрираат со биометриски податоци – отпечатоци од прсти и фотографија. По оваа иницијална регистрација, при секој нареден влез тие ќе можат да користат автоматизирани терминали на аеродромите и граничните премини, со што се очекува побрз проток и намалување на редиците.

Рокас нагласи дека ЕЕС не треба да се меша со ЕТИАС, системот за патни одобренија што ќе стапи во сила во иднина и за кој дополнително ќе се објават детали.

ЕЕС претставува заедничка електронска база која ќе ги евидентира сите информации за премините на надворешните граници на Унијата – датум, час и локација на секое влегување и излегување.