8 септември – Денот на независноста на Република Македонија

Пред точно 34 години, граѓаните на Македонија со убедливо мнозинство на референдумот ја изразија својата волја за самостојна, независна и суверена држава, ослободена од директивите и зависноста од Белград. Тој историски чин ја трасираше патеката на македонската иднина и ја зацврсти решеноста за изградба на држава која ќе се стреми кон мир, стабилност и развој.

Она што овој настан го прави уште повпечатлив е фактот што Македонија беше единствената поранешна југословенска република што ја напушти федерацијата без војна и без крвопролевање. Со тоа уште еднаш се потврди мирољубивиот карактер на македонскиот народ, но и неговата државотворна зрелост и историска свест.

Годишнината од овој голем ден е потсетник на заедништвото, храброста и одлучноста на генерациите кои успеаја да го остварат вековниот сон – создавање на сопствена држава. Тој сон, за кој многумина жртвуваа сè, за кој македонски револуционери, интелектуалци и борци гинеа, страдаа и поминуваа долгогодишни казни низ затворите, денес е наше наследство и обврска да го чуваме и надградуваме.