Мицкоски: Македонската економија е меѓу петте најдобри во Европа по раст на БДП

Македонската економија во вториот квартал од годинава забележала реален раст од 3,4 проценти, со што земјата се вбројува меѓу петте најуспешни во Европа според стапката на пораст на БДП. Ова денеска го истакна премиерот Христијан Мицкоски, кој оцени дека владините политики и мерки веќе носат видливи резултати.

„Во вториот квартал имаме реален раст на економијата од 3,4 проценти, што нè позиционира на третото место заедно со Хрватска. Пред нас се наоѓаат само Ирска и Кипар со стапка од 3,6 проценти. Да потсетам, во првиот квартал бевме на четвртата позиција, што значи дека трендот е позитивен“, изјави Мицкоски на свеченото пуштање во употреба на новата делница од автопатот Кичево – Охрид.

Тој нагласи дека економскиот раст не е само статистика, туку резултат што се чувствува и на пазарот на труд, бидејќи, според неговите зборови, во изминатиот период биле отворени околу 10 илјади нови работни места.