Македонската тенисерка Лина Ѓорческа продолжува со одличните резултати оваа година, стигнувајќи до своето трето финале во последните три натпреварувања и вкупно четврто финале во 2025 година.
Во финалето на ИТФ турнирот во Слобозија, Романија, Ѓорческа ќе игра против романската тенисерка Елена Бертеа, која во полуфиналето со 2-0 во сетови (6-3, 7-6(3)) ја победи сонародничката Георгина Кракун.
Во својот полуфинален меч, Ѓорческа со 2-0 во сетови (6-1, 6-4) ја совлада Марија Попа, а натпреварот траеше 86 минути. Во првиот сет, по 1:1 во гемови, македонската тенисерка направи серија од пет последователни гема и го доби сетот убедливо со 6-1 за 30 минути. Вториот сет беше повеќе неизвесен, нерешено до 2:2, кога Ѓорческа освои два гема за водство од 4:2. Ривалката изедначи на 4:4, но Лина ги освои следните два гема и го затвори сетот со 6:4, обезбедувајќи ја победата и пласманот во финалето.
