Министерот за надворешни работи на Бугарија, Георг Георгиев, во писмо упатено до своите европски колеги истакнал дека договорениот европски консензус од јули 2022 година претставува единствена основа за напредок на Република Македонија во процесот на интеграција во Европската унија и не смее да биде изменуван. Тој изразил загриженост поради, како што вели, постојаното неисполнување на обврските од страна на Скопје.
Во писмото, објавено од БГНЕС, Георгиев ги известил земјите-членки на ЕУ и европските институции дека Македонија наводно се обидува да ги ослаби клучните аспекти на консензусот. Според неговите зборови, наместо да се поттикне конструктивен дијалог и добрососедски односи, земјата се наоѓа на патот на конфронтација, провокации и отстапување од своите обврски, вклучително и со оспорување на договорите пред Уставниот суд во Скопје.
Георгиев нагласил дека Бугарија очекува Македонија да ги исполни своите обврски со искрена намера, додавајќи дека интеграцијата на земјите од Западен Балкан во ЕУ останува најдобро решение за регионот.
