Фото: Принтскрин
ВМРО-ДПМНЕ излезе со реакција на вчерашното обраќање на претседателот на ДУИ, Али Ахмети, за време на партискиот настан во општина Чаир. Од владејачката партија порачаа дека ваквиот настап е знак на очај во редовите на ДУИ, особено кога Ахмети повторно се навраќа на настани и тези стари речиси четврт век.
Според ВМРО-ДПМНЕ, наместо да понуди одговори и решенија за актуелните проблеми што ги засегаат граѓаните – како што се економската криза, корупцијата и иселувањето – ДУИ се обидува да ја врати јавната дебата назад во минатото.
„ДУИ може колку сака да потсетува на 2001, сега сме 2025, и не само што не може да ја делат Македонија, туку може и да завршат во затвор за криминал и за тоа што ја разјадуваат Македонија и ги злоупотребуваат пред сè своите гласачи. И една друга теза која ги повикавме Албанците да ја слушнат јасно, дали сте свесни дека додека ДУИ е на власт, овие 24 години има егзодус на Албанците (и на Македонците и останатите, но во огромен процент на Албанците), и има толку раселени Албанци од Македонија што Ахмети дури и да ја поделел во 2001, сега Македонија што ќе му останела ќе била иста и бетер како оваа целата, сиромашна, опљачкана и празна. Ние се бориме за доброто на сите. И апелираме да не се дозволува да се инволвира јавноста во овие теми затоа што Ахмети ако не зборува за овие теми станува безначаен, празен и гол, при што лесно се гледа неговото вистинско корумпирано лице, и на неговите најблиски. ДУИ без да се реформира освен со Филипче заради тоа што се исти и со исти вредности и одраз на еден ист ментален склоп, нема соговорник и публика кај никој друг во македонскиот блок, ниту пак некој ги сфаќа сериозно нивните потсетувања на конфликтот после 24 години нивно владеење во земјава од која остана пепел, сиромаштија и се произведоа тајкуни блиски до ДУИ и дел од ДУИ“, се вели во соопштението на ВМРО-ДПМНЕ.
