Фото: Принтскрин
Во центарот на Битола, на Широк сокак, во четвртокот навечер се случил необичен инцидент во кој бил нападнат странец што престојувал во Македонија. Настанот бил пријавен во 19:50 часот во СВР Битола од 32-годишен државјанин на Шведска, со иницијали С.Х.Д., кој моментално престојува во Дебар, соопшти Министерството за внатрешни работи.
Според пријавата, на оштетениот му пристапила група од неколку непознати момчиња на возраст од околу 20 години, кои се обиделе насилно да му ја соблечат маицата што ја носел. На парчето облека биле исцртани симболи и орел што ги поврзувале со знаме на друга држава.
Како што информираат од МВР, откако сфатил дека не може да им се спротивстави, странецот сам ја соблекол маицата и им ја предал на напаѓачите, по што тие веднаш ја напуштиле локацијата во непознат правец.
Полицијата презела мерки за расветлување на случајот и интензивно работи на пронаоѓање на сторителите.
