Фото: Принтскрин
Инфлацијата претставува сериозен економски предизвик во цела Европа, но во Македонија растот на платите е повисок од растот на цените, што значи дека животниот стандард на граѓаните не е намален. Ова го изјави министерката за финансии Гордана Димитриеска-Кочоска во гостувањето во централниот Дневник на ТВ Сител.
Таа нагласи дека Владата паралелно работи на краткорочни мерки кои имаат за цел да ги ублажат непосредните последици од инфлацијата, особено кај ранливите категории на граѓани. Сепак, според министерката, клучниот приоритет остануваат долгорочните структурни реформи и насочување кон инвестиции што треба да обезбедат стабилен економски раст.
„Кај нас, само во изминатата година, имаме раст на просечната плата од 10,1%. Во исто време, инфлацијата во последниот месец изнесуваше 4,8%, што значи дека животниот стандард не е намален – напротив, растот на платите е повисок од растот на цените. Инфлацијата е сложен проблем и нема „магично стапче“ за решавање. На краток рок, можат да се применуваат мерки како замрзнување на цени или маржи, но на долг рок потребни се суштински реформи. Токму затоа постојано нагласувам дека е неопходно поголемо вложување во земјоделството. Најголем раст на цените бележиме кај овошјето и зеленчукот, а тоа е директна последица од недоволното производство и климатските услови. Базичната инфлација е таа што го создава најголемиот ценовен притисок, особено преку услугите во угостителството. Тоа пак е резултат на растот на просечната плата, па потребни се подетални анализи за да можеме да направиме најреални проекции на инфлацијата и врз основа на нив да донесеме соодветни одлуки за даночната политика. Важно е да се нагласи дека минималната плата порасна за 5,6%, а просечната за над 10%, додека инфлацијата е 4,8%. Тоа значи дека животниот стандард не е намален, напротив – за разлика од периодот кога опозицијата беше на власт. Ако се погледнат податоците, тогаш просечната и минималната плата пораснаа за околу 35%, но цените на храната се зголемија за 39%. Тоа јасно покажува дека во тој период стандардот на граѓаните беше нарушен, додека сега имаме подобрување“, кажа Димитриеска-Кочоска.
