Фото: Митко Јанчев/Спасен Силјаноски
Градоначалникот на Кавадарци, Митко Јанчев, вечерва јавно одговори на прозивките од пејачот Спасен Силјаноски. Во својата реакција, Јанчев го повика музичарот да дојде во Кавадарци и да покаже колку публика може да привлече со свој настап.
Претходно, Силјаноски јавно го критикуваше градоначалникот, а реакцијата на Јанчев доаѓа како директен одговор на тие обвинувања.
„Нека повели пејачот кој го стави на исто рамниште гроздоберот со ,,роштиљада” и да каже во кој дел од програмата би се вклопил, а што е уште поважно, колку публика би донел во градот? Од каде би била таа публика, со оглед на тоа што на настанот во годините наназад доаѓаат гости не само од цела Македонија, туку и од соседни земји? И да му укажам, бидејќи очигледно не е доволно информиран, сите кавадаречки музичари кои ги спомнува, гостуваат не само на овој, туку и на секој гроздобер кој се одржал во минатото и секогаш биле максимално испочитувани од општината, бидејќи ние во Кавадарци знаеме како да го цениме и поддржиме своето. Не само локалните музичари, туку секоја година доаѓат и пејачи од други градови од Македонија. Тиквешки гроздобер не е само една голема сцена, има настапи и на помала сцена и секој настапува таму каде знае дека може да исполни капацитет. Кога сме кај големата сцена на која годинава ќе настапи српската евровизиска победничка Марија Шерифовиќ, и за време на чиј настап се очекуваат најмалку 50.000 посетители, нека одговори пејачот дали тој може да гарантира дека ќе донесе барем една петина од таа бројка. Затоа што гроздоберот не е само настан за забава, туку има огромно значење и од економски аспект, колку поголема ѕвезда доаѓа, толку поголем број на гости имаме, и со тоа се поголеми и економските придобивки на нашите граѓани“, кажа градоначалникот Јанчев за Викимедиа.
