На 6 септември во Кочани ќе се одржи првото издание на хуманитарната трка „Голак Треил“ – спортски настан кој ќе обедини планинско трчање и брзо одење по патеки низ прекрасните предели на планината Голак. Маршрутата е специјално избрана за учесниците и вклучува совладување на делови со поголема надморска височина, овозможувајќи уникатно доживување кое спојува спорт, рекреација и контакт со природата.
Оваа година трката се одржува во чест на Иле Гоцевски – возач на Брза помош од Кочани, кој трагично го загуби животот, оставајќи зад себе пример за несебичност, човечност и професионализам. Во негова чест, патеката ќе биде долга 11 километри, бројка што симболично го претставува бројот на неговите итни возења до Скопје во мисија за спас на човечки животи.
Настанот е отворен за сите љубители на спортот, планините и авантуристичкиот дух. Собраните средства од котизациите ќе бидат донирани на организацијата „Support Кочани“, со што трката добива изразен хуманитарен карактер и придонесува за заедницата.
