Фото: Принтскрин
Извор близок до Кремљ за Ројтерс изјави дека претстојниот самит меѓу Владимир Путин и Доналд Трамп во Алјаска најверојатно ќе донесе одредени резултати. Според него, двете страни веќе можеле да се усогласат околу неколку точки. „Веруваме дека ќе има договори по одредени прашања – Трамп не може да биде одбиен, а ние сме под силен притисок од санкциите за да одбиваме“, нагласил соговорникот.
Трамп во повеќе наврати се залагал за прекин на огнот во Украина, иако пред полетувањето кон Енкориџ призна дека процесот е покомплициран од очекуваното. Од своја страна, Путин само ден пред самитот го отвори прашањето за нуклеарните арсенали, сугерирајќи можност САД и Русија да потпишат нов договор за контрола на нуклеарното оружје. Во моментов, единствената важечка спогодба е СТАРТ-3 од 2010 година, која истекува во февруари 2026.
Путин на состанок со највисокото државно раководство посочи дека со Вашингтон разговараат за мир во Европа и глобална стабилност, додавајќи дека во иднина би можеле да се постигнат и договори за стратешкото офанзивно вооружување.
Политичкиот аналитичар Абас Гаљамов смета дека поврзувањето на темата за крајот на војната со глобалното нуклеарно разоружување е стратегија за завршување на конфликтот без јасен победник. „Ако конечниот договор опфати што е можно повеќе точки, тогаш ќе биде нејасно кој добил, а кој загубил, што ќе го заштити Путин од директни обвинувања за пораз“, вели тој.
Трамп, пак, најави дека во случај на напредок во разговорите, би можел да организира трилатерален состанок со украинскиот претседател Володимир Зеленски. Зеленски изјави дека добил поддршка од Трамп за безбедносни гаранции по завршувањето на војната, иако американскиот претседател јавно не се изјаснил за ова.
Прес-секретарот на Путин, Дмитриј Песков, веќе предупреди дека по завршувањето на самитот не се очекува потпишување официјални документи.
