Тошковски најави „маалски полицајци“

Министерот за внатрешни работи, Панче Тошковски, во интервју за емисијата „Вести Плус“ порача дека партизацијата во МВР ќе биде минато и дека институциите ќе се градат врз основа на стручност, професионализам и работно искуство.

„Факт е дека и според моменталната систематизација, началник на Одделот за организиран криминал мора да има најмалку десет години искуство. Опозицијата грубо ја манипулира јавноста, ширејќи страв дека ќе се вработуваат партиски кадри. Тоа нема да се случи. Ќе се вработуваат само лица кои ги исполнуваат стручните критериуми и условите пропишани со закон“, нагласи Тошковски.

Покрај кадровската политика, министерот најави и практична имплементација на концептот „маалски полицаец“, како дел од реформите во полициското работење.

„Со донесувањето на новиот Закон за полиција, очекуваме од есента да се зголеми присуството на полицијата на терен“, вели министерот.