Фото: Принтскрин
Православните христијани утре го чествуваат празникот посветен на иконата Троеручица – една од најпочитуваните икони на Пресвета Богородица, која низ вековите се прославила со многубројни чуда и благослови.
Историјата на оваа света икона води до 8 век, до времето на свети Јован Дамаскин, богослов и химнограф, кој живеел во тогашниот исламски град Дамаск и бил во служба на Омејадскиот калифат. Во тоа време, во Источното римско царство избувнала ереста на иконоборството – движење кое барало уништување на иконите. Јован, како ревносен бранител на иконопочитувањето, жестоко се спротивставил на оваа ерес.
Поради неговата силна поддршка за светите икони, царот Лав III Исавријанец го наклеветил пред калифот, обвинувајќи го за заговор. Како казна, Јован останал без својата десна рака – му ја отсекле. Со голема вера и молитва, тој ја зел отсечената рака, се повлекол пред иконата на Пресвета Богородица и започнал да се моли за исцеление. Неговата молитва била услишена – во сон му се јавила Богомајката и чудесно ја исцелила неговата рака, оставајќи само белег како сведоштво за настанот.
Во знак на благодарност, свети Јован Дамаскин направил сребрена дланка и ја прикачил на иконата – така таа добила уште една рака, и оттогаш е позната како Троеручица.
По ова чудо, Јован се повлекол во монашки живот во лаврата на свети Сава Освештен кај Ерусалим, носејќи ја со себе иконата. Пред својата смрт, му ја оставил оваа света икона на манастирот.
Неколку века подоцна, иконата мистично пристигнала во рацете на свети Сава Српски, кој ја донел во Србија заедно со уште една икона на Богородица – „Млекопитателка“ и игуменскиот стап на свети Сава Освештен. Свети Сава ја поставил иконата во манастирот Студеница, но со текот на времето, за да ја заштитат од османлиските освојувачи, монасите ја ставиле на едно магаре и го пуштиле по Божја волја.
Магарето го преминало целиот пат од централна Србија, преку Македонија, сѐ до Света Гора, каде што застанало пред портите на Хиландар. Браќата во манастирот ја пречекале иконата како вистински дар од небото. Подоцна, кога во манастирот избувнал спор околу изборот на нов игумен, иконата на чудесен начин самата се нашла поставена на игуменскиот трон – трипати по ред. Од тогаш, таа се смета за вечна игуманија на манастирот Хиландар, а човечки игумени се назначуваат само како нејзини заменски – проигумени.
Денес, иконата Троеручица претставува симбол на Божја милост и застапништво на Пресвета Богородица пред Синот Божји. Нејзиниот величествен лик, исполнет со длабока сериозност и мајчинска топлина, остава силен впечаток во душите на сите кои со вера ѝ се поклонуваат. Молитвата пред неа носи утеха, надеж и духовно обновување.
