Фото: Принтскрин
По долги години поминати во болка, сиромаштија и неизвесност, семејството Младеновски конечно го доби најдрагоцениот подарок – свој топол дом. Во малото кривопаланечко село, каде што животот отсекогаш бил тежок, човечките приказни често се ткаат од мака, но и од надеж. Една таква е и приказната на 42-годишниот Игор Младеновски, човек со срце поголемо од секојдневните тешкотии што го опкружуваат, објави „Срце на Дланка“.
Роден и израснат токму во ова село, Игор од мали нозе се навикнал на сиромашен, но чесен живот. Пред 15 години се оженил со девојка од истото село и создал семејство, верувајќи дека ќе може да го гради својот мир и среќа во амбарот што привремено го нарекуваа дом. Но, судбината им подготвила тежок удар – една ноќ, неговата сопруга ги оставила малите деца и си заминала без да се врати.
Оттогаш, животот на Игор се претворил во секојдневна борба. Работи од изгрејсонце до мрак за да обезбеди храна и основни услови за своите деца. Најстарата ќерка, малата Марија, иако сè уште дете, храбро ја презела улогата на мајка – ги облекува, капе, храни и учи своите братчиња, жртвувајќи ги своите детски соништа за доброто на семејството.
Деновиве, во дворот на Младеновски се слуша детска смеа – конечно имаат свој дом. Благодарение на добри луѓе и хуманитарни акции, семејството се всели во нова куќа, со кров над глава и прозорци кои гледаат кон подобра иднина.
Видеото може да се погледне на „Срце на Дланка“.
