Обвинителството со први детали од пукањето во Прилеп

Трагедија го потресе Прилеп – тројца членови на иста фамилија загинаа во шокантен настан што се случи вчера попладне во една од градските населби.

Според информациите на Основното јавно обвинителство, 63-годишен маж прво го усмртил својот 43-годишен внук од сестра и неговиот 11-годишен син, а потоа си го одзел животот.

„Дежурен јавен обвинител од Основното јавно обвинителство Прилеп изврши увид на лице место во куќа во центарот на Прилеп каде беа пронајдени безживотните тела на 11-годишно дете и двајца мажи на возраст од 43 и 63 години.

Според првичните сознанија, 63-годишникот најпрво го лишил од живот својот внук од сестра и неговиот син, поради семејни недоразбирања и нерасчистени имотни прашања. По извршување на делото, мотивите за стореното ги објавил и на една социјална мрежа, а потоа се самоубил.

Јавниот обвинител издаде наредба за обдукција на починатите, како и за прибирање на сите траги, оружје и муниција пронајдени на лице место кои ќе бидат предмет на вештачење.“, соопшти Основното јавно обвинителство.