Автомобил паднал 40 метри, дете е во критична состојба: Инцидент на експресниот пат Прилеп – Градско

Тешка сообраќајна несреќа се случи попладнево на експресниот пат Прилеп–Градско, каде што патничко возило марка Фолксваген Поло со скопски регистарски таблички излетало од коловозот и завршило во длабока падина.

Според првичните информации, несреќата се случила во остар лев свиок, каде возачот изгубил контрола врз возилото, по што автомобилот преминал преку веќе оштетен дел од заштитната ограда и паднал околу 40 метри надолу, завршувајќи во населено место во близина на патот.

„Во несреќата тешко е повреден возачот на автомобилот, како и едно 11-годишно дете кое се наоѓа во критична состојба. И двајцата поради сериозноста на повредите се префрлени на Клиничкиот центар во Скопје. На уште еден сопатник во автомобилот со полесни повреди му е укажана лекарска помош во велешката болница.

Јавниот обвинител издаде наредби за технички преглед на автомобилот, како и за проверка на присуство на алкохол кај возачот. Од лице место се подигнати и биолошки и други траги заради натамошно постапување“, соопшти Обвинителството.