Фото: Принтскрин
Министерот за внатрешни работи, Панче Тошковски, вечерва во интервју за централниот Дневник на телевизија Сител, откри нови информации поврзани со денешниот инцидент во скопската општина Чаир, каде што градоначалничката Данела Арсовска тврди дека била физички и вербално нападната за време на увид на спорна дивоградба.
Според изјавата на министерот, лицето кое Арсовска го идентификувала како директен напаѓач, заедно со уште две лица кои ја навредувале вербално, се приведени и во моментот се задржани во полициска станица. Случајот е проследен и до надлежен јавен обвинител, кој веќе дал конкретни насоки за понатамошниот тек на постапката.
Сепак, Тошковски нагласи дека институциите ќе постапуваат врз основа на сите релевантни факти и докази, нагласувајќи дека сè уште не може со сигурност да се утврди кој е вистинскиот поттикнувач на конфликтот.
„Треба внимателно да се испита случајот, за да не се покаже дека оној што јавно се претставува како жртва, всушност бил иницијатор на физичката пресметка“, изјави Тошковски.
„Дошла во полициска станица, била примена од страна на полициските службеници, отпочнале со полициски дејствија. Меѓувремено контактирале јавен обвинител. Лицето коешто го навела како такво е приведено е во полициска станица, и плус други две лица коишто вербално се заканувале. И пазете сега. При составување на записникот и примање на пријавата од страна на госпоѓата, истата станала и си отишла. Не потпишала записник“, кажа Тошковски.
