Фото: Принтскрин
Водата во Езеро Младост во моментов претставува потенцијален ризик по здравјето и не се препорачува за капење или било какви рекреативни активности, сè додека не се спроведат дополнителни анализи од релевантни стручни институции.
Според дел од извештајот на Центарот за јавно здравје, во езерото е забележано екстензивно размножување на алги, појава на густа жолто-кафеава пена и акумулација на големи количества органска материја со желатинеста, сунѓереста текстура. Овие визуелни индикатори упатуваат на развој на цијанобактерии – т.н. „сини-зелени алги“ – кои се познати по можноста да продуцираат опасни токсични соединенија наречени цијанотоксини, штетни по здравјето на луѓето и животните.
Дополнително, лабораториските анализи откриле присуство на хемиско загадување – нивото на амонијак во водата е речиси петпати над дозволената граница, што укажува на сериозно нарушување на природната рамнотежа во езерскиот екосистем, најверојатно како резултат на влијание од отпадни води или други загадувачи.
Со оглед на овие наоди, здравствените власти апелираат до граѓаните, особено до родителите на мали деца и лицата со чувствителна кожа или хронични заболувања, да се воздржат од капење или контакт со водата додека не се добијат сигурни резултати дека не постои здравствен ризик.
