Нови цени на горивата од полноќ: Поевтинуваат бензинот и дизелот

Регулаторната комисија за енергетика, водни услуги и управување со комунален отпад (РКЕ) донесе нова одлука за корекција на цените на нафтените деривати, со која малопродажните цени се намалуваат во просек за 2,30% во однос на претходната одлука од 27 јуни 2025 година.

Намалувањето е резултат на трендовите на светскиот пазар, каде референтните цени на дериватите бележат пад: кај бензините за 5,671%, кај дизелот за 2,639%, кај екстра лесното масло за домаќинство за 6,774%, додека кај мазутот е регистрирано пониско намалување од 1,701%. Дополнително, курсот на денарот во однос на американскиот долар, кој е клучен фактор во формирањето на цените, е намален за 0,3392%.

Согласно со оваа одлука, од 1 јули 2025 година од 00:01 часот ќе важат следните максимални малопродажни цени:

• ЕУРОСУПЕР БС–95: 75,50 денари/литар (намалување од 2,00 денари)
• ЕУРОСУПЕР БС–98: 77,50 денари/литар (намалување од 2,00 денари)
• ЕУРОДИЗЕЛ БС (Д-Е V): 69,50 денари/литар (намалување од 1,00 денар)
• Екстра лесно масло за домаќинство (ЕЛ-1): 69,50 денари/литар (намалување од 2,50 денари)
• Мазут М-1 НС: 39,583 денари/килограм (намалување од 0,605 денари)