(Видео) Лажни калуѓерки ги измамуваат туристите во Грција – проколнуваат ако не купите „свети“ предмети

Грчките туристички места последниов период се соочуваат со нов бран на измами – лажни калуѓерки и монаси кои се претставуваат како верски лица, ги напаѓаат туристите со барања за пари и дури ги проколнуваат ако одбијат да купат „свети“ предмети.

Овие измамници често се движат по плажите, болниците и фреквентните туристички дестинации како Халкидики, Солун и други региони, каде агресивно пристапуваат до минувачите. Наметливо им нудат бројаници и крстови, тврдејќи дека се бесплатни, а веднаш потоа бараат „придонес за манастирот“.

Мошне честа е и појавата да делуваат во парови – додека едниот измамник го одвлекува вниманието на туристот, вториот се обидува да изврши кражба. Во некои случаи, кога ќе бидат одбиени, измамниците преминуваат во вербална агресија и започнуваат да упатуваат клетви кон луѓето што не сакаат да дадат пари.

Очевидци велат дека лажните калуѓерки се лесно препознатливи – носат неаутентична и непрофесионална монашка облека, што е првиот знак дека не се дел од ниту една официјална верска заедница.