Славески: Не е срамота да се оди на 2-3 работи, јас во Америка работев и во супермаркет

Новиот гувернер на Народната банка, Трајко Славески, гостувајќи во телевизиската емисија „Бизнис 21“ на ТВ21, изрази став дека концептот на минималната плата во Македонија добил искривено значење.

Славески нагласи дека минималната плата не претставува инструмент што треба да обезбеди целосна егзистенција за четиричлено семејство, туку основен праг за надомест на труд.

Тој подвлече дека ваквата пракса не е карактеристична само за Македонија, туку е глобален стандард. Во прилог на ова, тој се осврна на сопственото искуство од студентските денови во САД, каде што работел во супермаркет за да си ги покрие трошоците, посочувајќи дека ангажманот во дополнителна работа не треба да се доживува како нешто срамно, туку како реалност на пазарот на труд.

„Минимална плата, во светот, онаму каде ја има, не гарантира дека со неа може да се издржува четиричлено семејство. Јас сум работел за минимална плата во САД, во Бостон, во супермаркет додека студирав. Се знае каков стандард можете да обезбедите со тоа, тие што земаат минимална плата работат по 2-3 работи. Би порачал во одреден период во животот, тоа не е срамота“, кажа Славески.

Фото: Принтскрин