Фото: МВР
Денеска, на 9 јуни 2025 година, припадници на Хеликоптерската единица при Министерството за внатрешни работи, по добиено барање за интервенција, успешно реализираа спасувачка акција на падините на планината Јабланица, во струшкиот регион. Во акцијата учествуваше и специјализиран тим од САЕ „Тигар“, кој заедно со пилотската екипа се упати кон непристапната планинска локација со хеликоптер.
По пристигнувањето на теренот, службите прецизно го лоцираа повреденото лице, кое се наоѓало во исклучително тешко достапна област. Благодарение на координираната и професионална интервенција, лицето беше безбедно извлечено и евакуирано од планинскиот предел.
Потоа, повредениот беше пренесен до Меѓународниот аеродром „Св. апостол Павле“ во Охрид, каде што го презеде екипа од Итната медицинска помош за понатамошен транспорт до здравствена установа и укажување на неопходната лекарска грижа.
