Фото: Принтскрин
Карпош сè почесто наликува на дива депонија – улиците се преполни со несобрано ѓубре, контејнерите претрупани, а отпадот се шири на сите страни. Ваквата слика стана секојдневие, предизвикувајќи гнев и револт кај жителите кои со право очекуваат почиста и уредена општина.
Градоначалникот на Општина Карпош, Стевче Јакимовски објави порака преку социјалните мрежи со која посочи дека му е срам како изгледа општината бидејќи ѓубрето не е собрано.
„Ќе бидам искрен – срам ми е како изгледа Карпош овие денови.
Срам ми е кога ќе поминам покрај преполни контејнери и расфрлан смет.
Срам ме е кога ќе видам граѓани што живеат чесно и си ги плаќаат давачките, а за возврат добиваат само запуштеност.
Не ми е лесно ни мене како градоначалник да гледам дека надвор од мојата надлежност, некој не си ја врши работата – а граѓаните страдаат.
И не е тоа некаков изговор – туку чувство на немоќ и горчина што не можам сам да го решам она што е системски проблем.
Карпош никогаш не смеел да изгледа вака.
Да ти е непријатно да поминеш по сопствената улица. Да наведнуваш глава кога ќе ти дојде некој дома“, објави Јакимовски.
