Фото: Принтскрин
Премиерот Христијан Мицкоски изрази сериозна загриженост во пресрет на претстојното објавување на извештајот за напредокот на Македонија во Европскиот парламент, кој треба да биде разгледан идната недела. Причината за неговата загриженост, како што посочи, е најавата дека еден од европратениците ќе поднесе амандман со кој би се довела во прашање посебноста на македонскиот народ.
Мицкоски информираше дека изминатите месеци Владата остварила интензивна комуникација и соработка со известувачот за Македонија во Европскиот парламент, Томас Вајц, при што целта била во финалниот текст на извештајот недвосмислено да се потенцира уникатноста на македонскиот јазик и идентитет.
Во однос на неодамна усвоената резолуција од бугарското Народно собрание, со која повторно се инсистира Македонија да ги исполни обврските од преговарачката рамка – вклучително и внесувањето на бугарската заедница во Уставот – Мицкоски истакна дека не гледа потреба за донесување нова резолуција во македонското Собрание.
– Она што Македонија го бара од Европската Унија се цврсти гаранции дека ова се последните билатерални условувања од страна на Бугарија. Единствено прифатливо решение за нас се уставни измени со одложено дејство – нагласи премиерот.
