Фото: Принтскрин
Нови згради никнуваат како печурки, залепени до самиот тротоар. А тротоарот? Окупиран од луксузни возила, паркирани со гордост како да се дел од урбан дизајн. Ѓубре се разлева околу преполнети контејнери, а нескратените гранки се надвиснати над пешаците и претставуваат закана. Секојдневна слика од метрополата.
Добредојдовте во Скопје – градот каде урбанистичкиот хаос се продава како „елитна населба“, а секој метар квадратен е блиску до магичната бројка од 5.000 евра. Зошто да не? Кој не би сакал да плати десетици илјади евра за стан со поглед кон преполн контејнер?
Можеби сме на пат да станеме „европска метропола“, но по сите стандарди на неред, нечистотија и нефункционалност. Колку повеќе растат цените на квадратот, толку повеќе тоне квалитетот на животот. Иронијата? Совршено урбана.
Затоа, ако сакате паркинг на тротоар, непрооден тротоар и ѓубре до колена – побрзајте! Секој квадрат е шанса да бидете дел од урбаното чудо наречено Скопје. Цена? Симболични 5000 евра.
Ако навистина сакаме да живееме во модерен и достоинствен град, потребна е сериозна работа и вложување – и од институциите и од граѓаните. Мора да ја подигнеме свеста за хигиената, редот и јавниот простор. Само така, со заедничка одговорност, Скопје може да стане град во кој не само што се гради, туку и се живее.
На видеото на „Скопје Скопска“ е претставен Карпош 2, меѓутоа проблемот не е само во тој дел од главниот град на Македонија, туку насекаде, а за тоа може да се уверите со една обична прошетка низ метрополата.
