„Нема поголеми анти-Албанци од тие кои ги ставаат граѓаните да живеат во небезбедни услови“, велат од Левица

Политичката партија Левица остро реагираше на, како што велат, обидите на градоначалникот на Општина Чаир, Висар Ганиу, и коалицијата ВРЕДИ, да ја пренасочат јавната дебата од сериозните сомнежи за криминал и корупција кон етнички наратив.

„Левица ги отфрла обидите на градоначалникот на Општина Чаир, Висар Ганиу, и коалицијата ВРЕДИ да го заменат правниот одговор за сериозни наводи за криминал и корупција со опасна и незрела етничка реторика.

Обвинувањата за коруптивни зделки поврзани со дивоградби, фалсификување на исправи, злоупотреба на службената положба се прашања од јавен интерес и не смеат да се релативизираат преку етничкиот наратив.

Потенцираме дека нема поголема навреда, ниту потешка форма на “антиалбанство”, од втурнување на граѓаните во небезбедни, нелегални услови за живеење, додека истовремено се богатиш на нивна сметка. Тоа не е борба за достоинство и еднаквост, туку свесно изложување на жителите на урбан хаос, ризици и опасно нехумани услови“, соопшти Левица.