Фото: Принтскрин
Воениот полигон Криволак повторно ќе биде центар на меѓународна воена активност, откако Северна Македонија ќе биде домаќин на големата мултинационална воена вежба „Immediate Response 2025“ („Брз одговор 2025“), што ќе се одржи во периодот од 26 мај до 9 јуни.
Во рамки на вежбата, ќе бидат користени модерни борбени системи и средства, меѓу кои тенкови Leopard 2A6, хеликоптери Apache AH-64, HMMWV (Humvee) возила, JLTV оклопни возила, како и друга разновидна воена техника и логистичка опрема.
На вежбата ќе учествуваат над 2.000 припадници на вооружените сили од седум земји членки на НАТО и две партнерски држави. Домашните сили ќе бидат претставени со 950 припадници од Армијата на Северна Македонија, меѓу кои лесниот пешадиски баталјон, Воздухопловниот ВИНГ и персоналот на Логистичката база.
САД ќе бидат најбројно претставени со контингент од 710 војници од Националната гарда на државата Вермонт. Во вежбата ќе учествуваат и контингенти од:
- Албанија (30 припадници)
- Грција (50)
- Италија (30)
- Црна Гора (185)
- Обединетото Кралство (двајца учесници во улога на набљудувачи или супервизори)
- Партнерските држави Австрија (70) и Косово (150)
