Пијанистот Трпчески го освои Рим со „Македонисимо“

Македонскиот пијанист со светска кариера, Симон Трпчески, синоќа настапи во еден од највпечатливите историски простори во Рим – Хорти Салустијани, како дел од манифестацијата „Македонија во чест на Свети Кирил“. Настанот се одржа по повод одбележувањето на делото и значењето на сесловенските просветители, во организација на македонските институции во Италија.

Трпчески во своето обраќање изрази голема благодарност за можноста повторно да биде дел од настан што ја слави писменоста, духовноста и културната историја на македонскиот народ.

„Голема е честа повторно да настапам во рамки на оваа значајна манифестација. Последен пат бев дел од неа уште во времето на претседателот Борис Трајковски. Мина доста време, но чувството е исто – исполнето со гордост“, кажа Трпчески.