„Дел од повредените имаат отворени рани“: Повеќе од 110 пациенти прегледани по пожарот во Кочани

Тим од медицински специјалисти од скопските клиники, кој изминативе неколку денови престојуваше во Општата болница со проширена дејност во Кочани, ја заврши теренската евалуација на состојбата на лицата повредени во пожарот што избувна во дискотеката „Пулс“.

Во рамки на посетата, беа извршени прегледи на повеќе од 110 пациенти, кои претходно се лекуваа во странство, а моментално добиваат редовна физикална терапија и третмани на раните во кочанската болница. Покрај нив, на увид се јавиле и лица кои биле хоспитализирани во домашни медицински центри, а сега доаѓаат на дополнителна контрола и консултации.

Директорката на болницата, д-р Кристина Серафимова, истакна дека во следните денови се очекува комплетен и официјален извештај од страна на специјалистичкиот тим, кој ќе даде јасна слика за напредокот на повредените два месеца по трагичниот инцидент.

Во оваа опсежна активност се вклучени и волонтерите од иницијативата „Support Kocani“, кои заедно со здравствените професионалци обезбедуваат не само медицинска поддршка, туку и неопходна финансиска и логистичка помош за погодените.

„Констатиравме дека дел од повредените што се вратија од лекување имаат отворени рани, а кај некои се потребни дополнителни пластични интервенции. Нашата болница нема доволно кадар ниту опрема за вакви случаи. Најголемата загриженост е ризикот од инфекции и евентуална сепса. Веќе имавме случаи при преврски да се откине дел од кожата“, кажа Иван Ивановски од „Support Kocani“.