Ѓоковиќ докажа дека е најдобар – го освои 100. пехар во кариерата

Новак Ѓоковиќ дојде до историска победа и ја освои својата 100-та титула во кариерата, совладувајќи го упорниот Хуберт Хуркач со 2-1 во сетови (5-7, 7-6, 7-6) во драматичен и неизвесен меч во Женева.

Полјакот му зададе сериозни проблеми на светскиот ас, особено во првиот сет, кога ја искористи слабоста на Ѓоковиќ во завршницата и го доби сетот со 7-5. Иако Србинот имаше две брејк-топки во петтиот гем, Хуркач покажа цврстина и се избори за водство.

Во вториот сет, и двајцата тенисери влегоа во сериозна борба, одржувајќи го својот сервис без отстапки. Сетот кулминираше во тај-брејк, каде што Ѓоковиќ покажа класа и убедливо славеше со 7-2, враќајќи се во мечот.

Третиот сет започна со изненадувачки брејк на Хуркач, кој поведе и го диктираше темпото, но искусниот Ѓоковиќ успеа да се врати во осмиот гем, израмнувајќи на 4-4. Финалето продолжи во ист ритам – неизвесно и интензивно, сè до нов тај-брејк, каде што Ѓоковиќ уште еднаш блесна и со идентични 7-2 го запечати триумфот.