Мицкоски пред средбата со Бугарија: Можеби ќе кажат каде исчезнаа 200.000 Македонци

Премиерот Христијан Мицкоски изјави дека Македонија прифатила да учествува во разговори со Бугарија кои ќе се одржат во рамките на претстојниот НАТО самит.

Според неговите зборови, на средбата ќе ја претставува претседателката Гордана Сиљановска-Давкова, а на масата ќе седнат и четворица високи претставници од Европската Унија, како и претставници од земји-членки на НАТО.

Мицкоски потенцираше дека Македонија е определена за стабилност и конструктивност во регионот: „Ние сме фактор на стабилност и така треба да се однесуваме. Во нашиот регион има држави кои често рефлектираат нестабилност, а ние треба да бидеме спротивното – држава што носи смиреност и разбирање.“

Тој додаде дека е важно да се одржуваат дијалози и да се сослушаат сите страни, со надеж дека ќе се разоткријат прашања од минатото кои сè уште се чувствителни: „Можеби ќе слушнеме аргументи што досега не сме ги знаеле. На пример, би било корисно да се отвори темата за исчезнувањето на околу 200.000 Македонци од Западна Бугарија во периодот од 1956 до 1965 година – прашање што сè уште останува неразјаснето.“