Фото: Принтскрин
Градоначалничката на Скопје, Данела Арсовска, попладнево јавно ја алармираше јавноста за сериозен еколошки проблем во населбата Аеродром, каде што е откриен нелегален ископ на речниот брег на Вардар.
Како резултат на овој неовластен зафат, на теренот се појавило вештачко езеро составено од отпадни води, што, според градските власти, претставува потенцијална опасност по животната средина и здравјето на граѓаните.
„Во општина Аеродром, затекнати при нелегални активности на бесправна експлоатација на коритото на реката Вардар, од фирма која нема никакви лиценци, елаборати, дозволи и одобренија ниту за работа, ниту за механизацијата со која ги извршуваат овие злодела против природата, а што потенцијално претставува и опасност по здравјето на граѓаните.
Почитуван Министер Тошкоски, ова сметајте го и за пријава против лицето Ќамил Османовиќ и неговите соработници кои упатија пред сведоци закани по мојот живот и по животот на моето семејство, за што и формално ќе поднесам пријава до вас.
Никој не им се плаши, но убаво би било да видиме дали ќе постапите бидејќи неказнивоста и непостапувањето предизвикува да мислат дека се недопирливи пред законот.
За случајот се известени Министерството за животна средина и просторно планирање, МВР и сите надлежни институции. Еве ја ситуацијата на терен. Како во прашумите на Амазон, но во Скопје.
Нелегален ископ на криминалците од Прогрес Компани Долно Коњари, браќата Ќазим и Ќамил Османовиќ, кои додека си тераат бизнис и прават пари со енормно загадување на Вардар и природата, имаат време и да се закануваат. Повелете институции, постапете“, објави Арсовска.
