Фото: Принтскрин
Во текот на денешниот ден, во Јавната здравствена установа – Институт за јавно здравје беа доставени два сомнителни случаи на инфекција со вирусот Monkeypox (мајмунски сипаници), кои претходно биле прегледани на Клиниката за кожни болести. Дополнително, за овие пациенти беше побарано и тестирање на ХИВ, сифилис и херпес.
По добиените мостри, Институтот спроведе детални лабораториски анализи преку три различни дијагностички методи, со што официјално се потврди присуството на вирусот кај двете лица. Ова претставува првпат во земјава да бидат лабораториски евидентирани случаи на мајмунски сипаници.
По потврдата на инфекцијата, надлежните институции – Министерството за здравство, Клиниката за кожни болести, Инфективната клиника и други релевантни служби – беа веднаш информирани. Во согласност со утврдените здравствени протоколи, беше спроведено брзо постапување за спречување на понатамошно ширење на инфекцијата.
Лекарот што првично ги прегледал пациентите ги извести за резултатите, а во меѓувреме епидемиолозите од Институтот започнаа со теренска работа и анкетирање на пациентите.
