Фото: Фатмир Битиќи
Синоќа матурантка беше ќерката на пратеникот и потпретседател на СДСМ, Фатмир Битиќи, а овој семеен и емотивен момент тој реши да го сподели со јавноста преку објава на социјалната мрежа Фејсбук.
Во својата порака, Битиќи не ја криеше гордоста кон ќерката Калтрина, истакнувајќи ја љубовта и восхитот кон нејзиниот раст и успех. Но, покрај топлите зборови, тој искрено ја искажа и личната болка и разочараност што, како родител и јавна личност, не успеал да ѝ овозможи повеќе можности и европска перспектива тука, во сопствената земја.
„Вечерва се чувствувам горд и полн со емоции – како вчера да беше кога првпат ја однесов во градинка. Денес стои пред мене како матурантка со животен сјај во очите и соништа пред себе.
И покрај сите мои обиди и желби, жал ми е што не успеав да ѝ отворам европски врати, да ѝ овозможам повеќе перспективи и шанси овде, во татковината. Секој родител сонува да направи повеќе, да даде повеќе.
Но, знам едно – ти си борец, Калтрина. Ти си доволно силна, паметна и храбра да го најдеш вистинскиот пат, без разлика каде ќе те однесе животот. И јас секогаш ќе бидам тука, со срце полно љубов и поддршка. Среќна матура. Денес светот е твој“, напиша Битиќи.
