Фото: МВР
Струмица е завиена во тага по трагичниот настан кој се случи синоќа, кога во близина на месноста Крива Река, зад магацините на подружницата на „Македонски шуми“, беше пронајдено безживотното тело на 19-годишен матурант од едно локално средно училиште.
Според досега достапните информации, момчето било пронајдено од неговата мајка и еден близок пријател, кои излегле да го бараат откако тој не се вратил дома подолго време, пренесе ТВ Сител. Откако телото било забележано, веднаш бил повикан лекар, кој констатирал смрт.
На местото на трагедијата излегле екипи од Секторот за внатрешни работи Струмица, како и јавен обвинител од Основното јавно обвинителство, кој го води случајот. По наредба на обвинителството, телото било пренесено на обдукција за да се утврдат точните околности под кои настапила смртта.
Основното јавно обвинителство Струмица денеска соопшти дека обдукцијата е завршена и дека, според првичните наоди, на телото не се пронајдени траги на насилство. Сепак, за целосно разјаснување на причините за трагичниот настан, се очекуваат резултатите од токсиколошката анализа, кои треба да дадат подетална слика за тоа што му се случило на младиот струмичанец.
