Фото: Принтскрин
Британскиот амбасадор во Скопје, Метју Лосон, денеска јасно ги демантираше шпекулациите што се појавија во дел од медиумите, според кои Македонија би прифатила мигранти од Велика Британија како дел од најавеното стратешко партнерство меѓу двете земји.
На заедничката прес-конференција со премиерот Христијан Мицкоски во Владата, Лосон нагласи дека станува збор за безбедносна и полициска соработка, а не за миграциски договор.
„Мило ми е што постои согласност за оваа соработка, но сакам да бидам јасен – договорот се однесува исклучиво на зајакнување на полициската соработка и справување со организираниот криминал, особено со криминалните групи. Ништо од ова не подразбира дека Македонија ќе прифаќа мигранти од Обединетото Кралство“, изјави амбасадорот Лосон.
