Фото: Принтскрин
Во Основното училиште „Јан Амос Коменски“ во скопската општина Карпош, речиси цела паралелка од четврто одделение ја прекина наставата, откако родителите одлучија да го бојкотираат учењето поради сериозни загрижености за безбедноста на нивните деца.
Причина за протестот е, како што велат родителите, насилното однесување на еден ученик, кое трае подолг временски период и веќе ги надминало сите граници на толеранција.
Инцидентите кулминирале минатиот петок, кога според сведочења, ученикот физички ја нападнал наставничката – ја гризнал за рака и ја удрил по главата. Поради сериозноста на нападот, морала да интервенира и Итната медицинска помош, а наставничката била пренесена на лекарски преглед.
Загрижени и револтирани, родителите утрово излегоа на протест пред училиштето, барајќи итна реакција од надлежните институции. Тие апелираат до училиштето и Министерството за образование да преземат соодветни мерки за заштита на учениците и наставниот кадар, како и да се најде соодветно решение за ученикот со насилно однесување.
