Фото: Принтскрин
Основниот кривичен суд во Скопје денеска изрече казна затвор од 12 години за Васил Јованов, кој е прогласен за виновен за тешката сообраќајна несреќа во која животот го загуби младата Фросина Кулакова. Несреќата се случи пред околу пет месеци, на булеварот „Партизански одреди“, во близина на Универзална сала во Скопје.
Јованов беше обвинет за кривичното дело „Тешки дела против безбедноста на луѓето и имотот во сообраќајот“, откако утврдено беше дека управувал возило со голема брзина – 91 километар на час – без да поседува возачка дозвола. Во моментот на несреќата, тој минал на црвено светло и ја удрил Кулакова, која го преминувала булеварот на зелено светло за пешаци. Од силината на ударот, таа починала на самото место.
Таткото на Фросина по пресудата извика “Судот – мафија!”, додека друг член од семејството му се обрати на Јованов – “Само да не те сретнам, не ми се смеј цинично“, пишува „24инфо“.
