Мицкоски откри кој бил најтешкиот ден во неговиот живот: Во 3.30 часот некој ми тропна на вратата и ми ја соопшти лошата вест

Премиерот Христијан Мицкоски денеска првпат јавно проговори за најтешкиот миг во неговиот живот – трагичната вечер на 16 март, кога избувна катастрофален пожар во дискотеката „Пулс“ во Кочани, при што животот го загубија 62 млади луѓе.

Настапувајќи на Самитот „Македонија 2025“, Мицкоски со тешко срце ја опиша таа ноќ како „момент кој засекогаш ќе остане жива рана во мојата душа“. Тој призна дека и денес, со иста болка и тага, се сеќава на тие страшни часови.

„Се сеќавам дека тоа утро беше околу 3:30 часот кога човек затропа на вратата од мојот дом. Кога отворив тоа беше еден од луѓето на обезбедувањето на министерот за внатрешни работи. Бидејќи не го гледав телефонот, нормално во тоа време логично е да спиете и потоа кога го погледнав, ја видов пораката. Веднаш се соземав, ги повикав луѓето од мојот тим за да се упатиме во Кочани. Таму веќе беше министерот за внатрешни работи, по што бевме во полициската станица. Тоа беше можеби најтешкиот ден во мојот живот“, кажа Мицкоски.