Фото: Ali Ahmeti/Facebook
Лидерот на Демократската унија за интеграција (ДУИ), Али Ахмети, одржа остар говор во Струга, во кој упати сериозни обвинувања кон македонските политички елити, предупредувајќи на системска одмазда и маргинализација на Албанците од институциите на државата.
Според него, ваквите политики не само што се спротивни на европските вредности, туку можат да предизвикаат длабоки последици по стабилноста и меѓуетничките односи во земјата.
„Оваа одмазда против Албанците не ѝ помага ниту на државата, ниту на нејзината европска иднина. Таа поттикнува револт, бунт кај Албанците. А тие тоа не го разбираат! Ова мора да се сфати сериозно и правилно!“, истакна Ахмети пред поддржувачите.
Ахмети посебно се осврна на, како што рече, систематското отстранување на албанскиот јазик од институционалните табли, патокази и други јавни обележја, како и на сѐ почестите политички напади врз Албанците и нивните национални симболи. Тој овие постапки ги оцени како длабоко антиевропски и спротивни на духот на мултикултурната демократија.
„Како може Швајцарија да функционира со четири службени јазици, а Македонија да има проблем со два?“, праша Ахмети, додавајќи дека унапредувањето на јазичните и културните права на Албанците е темел за стабилност, а не причина за поделби.
Ахмети повика на разум и одговорност од страна на македонските политички чинители, со апел да не се продлабочуваат тензиите и да не се загрозуваат тешко изградените меѓуетнички односи.
„Да сакав да ја поделам, ќе ја поделев во 2001 година кога државата предложи поделба на Македонија. Но, не сакав да им нанесам нови гробови, нови рани на Албанците, бидејќи некои ќе останат тука, некои таму, некои ќе се разделат. Но, Албанците треба да живеат слободни и рамноправни во својата земја“, додава тој.
