Фото: Принтскрин
Германскиот канцелар Фридрих Мерц денес престојува во Киев заедно со шефовите на држави на Франција, Велика Британија и Полска, во знак на цврста поддршка и солидарност со Украина. Четворицата лидери ја нагласија потребата од обединет меѓународен пристап кон конфликтот и итна деескалација.
„Со оваа заедничка посета испраќаме јасна порака: стоиме рамо до рамо со Украина. Нашиот став е координиран, единствен и усогласен и со ставовите на американската влада, вклучително и со претседателот Доналд Трамп,“ изјави Мерц.
Тој нагласи дека сите страни се залагаат за 30-дневен прекин на огнот како предуслов за почеток на мирољубиви преговори.
„Ова е моментот кога иницијативата е префрлена на страната на Москва. Сега е ред на Владимир Путин да покаже дали има волја за мир. Понудата е на маса,“ порача германскиот канцелар.
Мерц предупреди дека, доколку до крајот на викендот не се воспостави прекин на непријателствата и доколку Кремљ продолжи да ги одбива дипломатските иницијативи, западните сојузници се подготвени за остри чекори.
„Ќе следи сериозно заострување на санкциите кон Руската Федерација. Помошта за Украина нема да запре – ќе продолжиме со силна политичка и економска поддршка, но и со зголемена воена помош,“ истакна Мерц во изјава за германскиот весник „Билд“.
