Фото: Gordana Siljanovska Davkova
Демократската унија за интеграција (ДУИ) излезе со реакција во која изразува загриженост поради, како што велат, отворената поддршка на претседателката Гордана Силјановска-Давкова за одредени владини политики што, според нив, го поткопуваат мултиетничкиот карактер на државата.
Во соопштението упатено до јавноста, од ДУИ нагласуваат дека ваквиот став на претседателката не само што ја доведува во прашање нејзината неутралност како шеф на државата, туку и испраќа негативна порака до граѓаните од различни етнички заедници
„Во време кога мултиетничкиот карактер на Република Северна Македонија е под сериозна закана, Претседателката Гордана Силјановска Давкова отворено се позиционираше на страната на Владата, занемарувајќи ги механизмите за заштита од етничка мајоризација. Со нејзината изјава дека „не е важно колку пратеници Албанци ќе го напуштат парламентарното мнозинство, сѐ додека Владата има 61 пратеник – нема потреба од предвремени избори“, Претседателката испраќа јасна порака дека етничкиот баланс и чувствителноста на коалициските партнерства не се дел од нејзиниот политички приоритет. Силјановска многу лесно ја напушти клучната улога која Претседателот на државата треба да ја има – да биде фер арбитар на различните политички позиции со цел да ги обединува сите граѓани, без разлика на нивната етничка, политичка или било каква друга припадност. Наместо обединувач, таа избра да биде дел од партиската поларизација. Наместо да биде глас на уставната обврска за градење соживот и консензус, Претседателката избра да стане гласноговорничка на едноетничката доминација“, соопштија ДУИ.
