Фото: Saso Serafimovski
Скопјанецот Сашо Серафимовски продолжува со своето духовно патување кон романскиот град Јаши, каде што се наоѓа соборниот храм со моштите на Света Петка – дестинација што ја избрал како симбол на вера и преданост.
На осмиот ден од своето пешачко поклоничко патешествие, Серафимовски стигна до манастирот Тумане, кој се наоѓа на територијата на соседна Србија. Следната станица на неговиот пат е Ѓердап – граничната област меѓу Србија и Романија, позната по импресивните природни предели и културно-историското значење.
Овој необичен подвиг започна на 26 април, кога Серафимовски тргна од Скопје, одлучен да го измине целиот пат до Јаши пеш. За време на целото патување, тој е придружуван од логистичко возило што обезбедува медицинска поддршка и сите неопходни ресурси за безбедно и успешно остварување на целта.
