Фото: Принтскрин
Лидерот на Демократската унија за интеграција (ДУИ), Али Ахмети, најави дека партијата е подготвена да организира масовни протести во поддршка на поранешниот министер за економија Крешник Бектеши, во случај Обвинителството да покрене постапка против него во врска со трагичниот настан во дискотеката „Пулс“ во Кочани, каде што животите ги загубија 62 млади лица, а околу 200 беа повредени.
Во интервју за „Слободен печат“, Ахмети јасно порача дека лично ќе се вклучи во протестите и нема да се повлече сè додека не се иницираат предвремени парламентарни избори. Тој оцени дека постои сериозна закана од селективна правда, која може да резултира со политички мотивирано обвинение против Бектеши.
Ахмети истакна дека протестите ќе бидат масовни и редовни, со мобилизација на повеќе од 10.000 активисти, членови и симпатизери на партијата.
„Ќе протестираме за вистината и правдата – за Крешник, но и за децата што ги загубија животите во Кочани. Ако јас излезам на улица, нема враќање назад“, кажа Ахмети за „Слободен печат“.
