Фото: Собрание на Република Македонија
Собранието на Република Македонија распиша јавен конкурс за изработка на нов официјален заштитен знак (лого), со цел да се воспостави модерен, усогласен и препознатлив визуелен идентитет на институцијата.
Согласно објавеното од собраниската прес-служба, иницијативата има за цел да го рефлектира државниот карактер на законодавниот дом, преку дизајн што ќе ги инкорпорира националните симболи, како и вредностите, мисијата и визијата на Собранието.
Во конкурсот детално се наведени условите кои треба да ги исполнуваат поднесените идеи. Освен визуелна оригиналност, од учесниците се бара да понудат и детално објаснување за симболиката на логото – значењето на употребените елементи, формите и боите. Исто така, новиот знак мора да биде прилагоден на три јазични верзии: македонски на кирилица, албански и англиски, соодветно со нивните писма.
