Фото: Принтскрин
Украинскиот претседател Володимир Зеленски остро реагираше на најавата на рускиот претседател Владимир Путин за „велигденски прекин на огнот“, нарекувајќи ја иницијативата циничен обид за манипулација со човечките животи.
„Уште еден обид на Путин да си игра со човечки животи“, напиша Зеленски на Телеграм.
Тој истакна дека и покрај најавите за прекин на огнот, руски дронови и понатаму летаат над украинска територија. Иако Зеленски директно не се изјасни дали Киев ќе го прифати предлогот за прекин на огнот, неговата изјава укажува на скептицизам и недоверба кон руските намери, особено по континуираните офанзиви на неколку фронта.
Во меѓувреме, руското Министерство за одбрана објави дека нивните сили напредувале и успеале да ја преземат контролата врз селото Олешња, кое било едно од последните упоришта на украинската војска во граничниот регион на Курск.
