Свештената Бигорска Обител се приклучува на јавните апели упатени од страна на државните институции и граѓански организации, кои повикуваат на намалување на цените на основните прехранбени производи во пресрет на Воскресението Христово – најголемиот и најрадосниот христијански празник.
Од Обителта потсетуваат дека празничната атмосфера и духовната радост треба да бидат достапни за сите, без исклучок, особено за оние кои се соочуваат со тешки економски услови.
„Длабоко веруваме дека празнувањето на Христовото воскресение е повод за заедништво, милосрдие и љубов кон ближниот. За жал, со тага и разочараност сведочиме на ново зголемување на цените кај одредени трговци, токму во деновите кога се повикуваме на хуманост и добрина“, истакнуваат од Бигорскиот манастир.
Тие нагласуваат дека ваквите постапки, особено во моменти кога народот се подготвува за голем духовен празник, претставуваат навреда за многу семејства. Тие, иако живеат во сиромаштија, не се лишени од достоинство и копнеат барем за скромна радост – празнична трпеза, топлина во домот и заеднички мигови со најблиските.
