Македонија е горда: Младинците на Пелистер се пласираа на Ф4 во Лига на шампиони

Младинскиот состав на македонскиот ракометен шампион Пелистер постигна голем успех, обезбедувајќи пласман на завршниот турнир од Младинската Лига на шампиони (ЛШ), кој ќе се одржи во Келн. Во драматичен и крајно неизвесен натпревар, битолските надежи славеа со минимална победа од 37-36 против силниот тим на Динамо Букурешт.

Најзаслужен за победата беше Алем Хаџиќ, кој одигра феноменален меч и постигна 12 гола, носејќи го својот тим до историски триумф. Во таборот на ривалот, Станчиу и Димитру се истакнаа со по 11 голови, но тоа не беше доволно за да го спречат македонскиот состав на неговиот пат кон фајнал-форот.

Со оваа победа, Пелистер им се приклучи на Барселона, Веспрем и данскиот ГОГ, кои веќе обезбедија место на завршниот турнир. Присуството меѓу најдобрите четири е огромно достигнување за македонскиот ракомет, особено за младинскиот сегмент.

Алем Хаџиќ не само што беше најефикасен на натпреварот, туку беше и избран за најкорисен играч (МВП) на турнирот, благодарение на неговите импресивни настапи во текот на целото натпреварување. Покрај тоа, заслужено се најде и во идеалната постава на турнирот, каде му се придружија и неговите соиграчи Јован Марковски и Леонид Лозановски, што само ја потврдува одличната форма и тимска работа на младите пелистерци.